به نونین بی سر و پاین دنیای تها هر سرکار تلوسیت که جهانی هاکم و وازدار بیت و زردی نه زوریت که شه وت مسترینی را بگندیت ، په راجانی چیردست کنگا ، هر وڑی که بیت ، هاس ذهنی وڑا وترا بایدنت گون نوک و نوکترین هتیاران سمبالیت . بین الاکوامیین دومیین جنگ و جڑپا که دنیا دو بهر بوت و سارتین جیڑه یی کینکا گرمین جنگ وجڑپ هم مسترین لیبی را بنا کرت ، مسترین دو کوئت په وتی سیالی سر کٹ کنگ و وتی تاکتی مزبوت کنگا چیر شه دگرانی چمان ، مدرنین سلیهی دیمری دییگا دست پرینتنت . یو اس ای ای ریسگی سرا اوشتات و ۱۹۴۵و سالا جوهریین سلیهی واوند بوت و اولیین وتنی ات که جوهریین سلیهی واکا داشت و اولیین ملکی هم ات که وتی جوهریین سلیها به همی سالا مان جاپانی ناگاساکی و هیروشیما کار مرز کرت و آهسری ایش بوت که ای دوکین هشکار هاک و پولک بوتنت و نندوکی ساه داتنت . بری چم همچمییا آ وهدی سویٹ یونین توانت که ۱۹۴۹ و سالا و شه آی و پد به پد بریتانیا ۱۹۵۲سالا ، پرانس ۱۹۶۰سالا ، چاینا ۱۹۶۴ سالا و انڈیا ۱۹۷۴سالا ای مدرنین سلیها مان وتی گدامانی تها گیش بکننت و همی نین برزی کوریا۲۰۰۶ سالا به جوهریین سلیهی داروکین ملکانی هشتمیین ریسگا اوشتات و شه آی پیسرا پاکستان ۱۹۹۸سالا گون دگرانی مدتا وتی دالی بٹی کاسگی پهنادا جوهریین سلیها اوشتارینت. پاکستان به بلوچستانی چاگی یی دمگا به “کوه کمباران” ی چیرا یک کیلو مٹریین کونڈی سست و ۱۹۸۸ سالی مئی ۲۸ کزا پیشینا ( ۱۵:۱۶ بجه ) اولین بما وتییا تراکینت . گون همی روچی راسکوه یی دلبندی ایٹم بمی تراکگا درستین بلوچ سوگی بوتنت ، گون همی تراکگا نه آیوکا بازین بلوچی زیند تباه بوت بلکین په آیوکین پشپدان هم بدین سوگاتی بوت که همی نون هم بازین زهگی ماسی لاپا ایبی انت ، مالوم نه انت که ایشانی اوبال کئی گٹا انت ، پنجاپی که بما تراکینت یا سرداریکه پاکستانا ایشت که وتی جوهریین بمبا ایدنا تراکینت ، برزی نیم کره ئا یا ڈگاری سرونی کپا برزگی گوات شه رونشتینا سونی رودرآتا سوریت ، ای بمی اسر اوگانستانی مهلوکی سرا و هاس کندهار، زابل و پکتیکای جهمنندانی سرا باز انت ، شه ایشی که مان اوگانستانا مجاهدانی هکومت ات وایش وت آی دستی مهلوک اتنت پمیشا شه اوگانستانی شولین و پنجاب پلوین سرکاری سونا تو گشی که دپیش مولو جتت چڑکای گوشا نپروشت و ایشانی هبر هم ایش ات که پاکستان آوانی جهادی لوگ انت و پنجابی بودار وپرلولوکین دالی تام شه دپیش انگته گار نبوته سرپتنت و آهسرا هبر به جای رست که نسیراله بابر بیدی ګجام پرس و سوجی پاکستانی مزنین کاروانی سر براهییا شه بولدک پترت وشه اوگانستانی تورغوندی سر بال آورت و ترکمنستانا شت ، بی وسین مزورین برهان الدین که اوگانستانی سرکاری زاهریین سمبولی ات نتوانت که ای کاروانی دیما بداریت . به جوهریین چم هم چمییا که پاکستان و انډیای نیاما رهدګ انت ، انډیا شه پاکستانا ګامی دیمترا انت و نون به آ ګروپی ریسګا اوشتاتګیت که جوهریین موادا بریبیر کنګا ونت ، پاکستانی چم دیست نه کنت که سیالی اینکس دیمابروت که بورتچگی پدی دهنزی هم مگندیت ، پمیشا پاکستان تلوسیت که وترا گون برزگی گروپا لوڑ بدنت . پاکستانی راهی مسترین پونگ ایشنت که زی یو اس ای سخی گریی کیسگی دپ پچ ات و هروهده یکه پاکستانا گرمی بکرتین تاسا زورت و ایزکی دپا پچ کرت وشه دوگا پرین تاسا سرا کشت مگه مروچی واجه ترامپ ایزکی دپا کورگرین جتگیت و سببی ایش انت که شه یک سونی پاکستان زیین اهمییتا په یو اس ای نداریت ، پرچا که راستام جیندی همید انت و مان اوگانستانا لشکر و پوجی انت و گون وتی چمان هالتانا چاریت و کنٹرول کنت و گیش چه ایشی پاکستانی چغرین چمانی سرا ایتوبار نداریت و دوهمی سببی ایش انت که نیٹو و یو اس ای پاکستانی جوهریین کهرمانی هپازتی باروا دل جننت ، پمیشا پاکستانا که تروریستانی رودینگ و پلامرزی و سرین بنجا انت گرونچگی چیرا انت که وتی جوهریین کنڈانی ساتگی سرا دلگوش بیت . پنجاپ نون تلوسیت و دلی هم چریت که رندا شه امریکا و روسیه به جوهریین تاکتی داروکین ملکانی تها سومی نیپاد آی بیت و ایش هم پیتاپی انت که پاکستانی جوهریین سنئتی دیمرییا دوکین ملک یو اس ای و بریٹیش گناهکار انت و هاس امریکا که نون باز دل جنت که پاکستانی جوهریین سلیهی کهرمانی آیوک چون بیت که ای سلیح تروریستانی گیرا مکپیت . سری ای هبرا نون مان نیامی رودرآتا و هاس انڈیین زری تیابا بندر یا پورتانی چم هم چمی انت ، دوبی که نون جهانی مسترین روزگزرانی و کاروباری بنجا انت و یک وهده یی گمباران ای دمئگی مسترین بنجا ات مگه پریشی پش کپت که مان ایرانا ریشو واکدار بوتنت و گون آوانی ای سیاستا ” نه رودرات ، نه روکپت ” شه جهان و هاس روکپتین ملکانی باورا دورکپت و ای بندر نزینکی گون دبئی سبب بوت که وتی پیه یی بنجاهی دیمی اهمیت کرزین نیپادا یل بدنت ، نین ایران و پاکستان گون وت چم هم چمی زورتگنت و تلوسنت که گنجین گوادر و چابهارا دبئیی هپوک بکننت ، پمیشا پاکستان وتی سرا چاینای کوپگی سرا اشت و ایران سونی انڈیا وترا شیوگ کرت ، گوادری بندر زردوکین امپریالیسمی چمانا چٹ کور کرت ، نون ایش همکوپگ گون پاکستانا به بلوچانی نسل کشی و پیه یی پلگا مین انت ، ایشی هم هور گون پاکستانی پوجا لانک بستگیت و گون بلوچ سرمچاران دست وزینچیک انت . مرچی مان بلوچستانا بی وسین بلوچ راجی سرا هر وڑی ناروائی تسر بیت ، بلوچ هر روچ بیگواه بیان انت ، کشگ بنت ، لوگیش سوچان انت . پاکستان پوج وجهندمیین آی اس آی و ایپ سی چنتی سال انت که گون آپریشنی نیمونا هورگون زردوکین گودرا بلوچانی سرا سکین بیتوری و ریڈین پالیسی دیما گپتگیت . بلوچستانا پنجاپی نونین سیاست هما وڑا که ۱۹۷۰ و سالا گون بنگالییان بوت ، بلوچانی لوگ شه دیره یی بگٹی و سبی گپته تا بلیده و پنجگورسوچان انت ، هر کسی سرا بیدی توپیرا ، پرک نکنت زال انت اگه مردین آدم انت ، کسان بیت اگه پیرین ، بیدی پرس و سوجی تیری بنت ، چیدگی ، لاپ پرین پاتمه مان بلیده یی النڈورگون لاپی کشتنت ، شهید رزاجهانگیری پیرین پتی سرا رهم نکرتنت ، گجر گون وتی مسترین زلم و سرزوری یی که مان پهره و بن پور بلوچانی سرا دارنت ، کبزه کنوکانی آ زوران سرانی دستا که مان پنجگور ، کیچ ، بولان ، آوران ، ….کنان انت شه پشتا بستنت . دو چیزی سرا بایدنت شرییا دلگوش بیت و آ ایش که : جهانی دموکراسیی واجه کار و پلامرزین روکپتین ملک ، سرا یو اس ای بارین کدین مکبوزه ئین بلوچستانی بی وسین بلوچانی توارا کوشکیننت و همتی بوڑی وارتیش و گون بلوچانی مدتی رسینگ و مزلومین تواری اشکینگا گجر ، پنجاپ وزردین امپریالیسمی هلاپی جوهدی پلامرز بنت و ای ملکانی وتسری یی دیما جلنت و گون بلوچانی دستی گرگا ، تروریسمی کونٹا شه ای دمگا نز کارنت و دایمیین سول و امنیت کارنت . دوهمی پاکستانی جوهریین هتیارانی امنیت کنگ و شه آی دیم گیری کنگ که بی واوند و هڑیین تروریستانی گیرا مکپیت ، ایش امریکای مسترین زمه واری انت اگه نه ای تروریست نه آیوکا په بلوچستان ، اوگانستان و نیامی ایشیا مسترین کهتری انت بلکین شه ناین ایلیونا هم په بنیادمان مسترین تاوانی انت . بلوچ راج شه یو ان ، یو اس ای و نیټوی بلوکا واهشت داریت که کارگلی درگیجیت و پاکستانی ۱۹۹۸ مئی ۲۸جوهریین بمی تراکگی بدین اسرا مان بلوچستان هور گون نونین زلم و زوراکیی که بلوچ راجی سرا بوهان انت پٹ و پول بکنت و بلوچانی تاوانا شه دشمنانش بگرنت و پاکستان یاگیین پوجا ناهو بجنت و بلوچانا په آوانی روائین هکی کٹگا مدت برسیننت ، پکت بلوچانی واکی رسگ و آجو بلوچستان توانت که تروریسمی بن و روتگا گون امریکا و نیٹوی کمکا بن گوئج بکنت و یک ایتوباریین سول و امنیتی را پری دمگ ودوردستین منتکه ئا شرین سوگاتی بیاریت .